अद्वितीय पर्वतशृंखला र विविध जीवन, मानिस, संस्कृति तथा जैविकविविधता रहेको तथा जल, उर्जा र अन्य प्राकृतिक स्रोतसाधनले धनी हिन्दुकुश हिमालय क्षेत्र विश्वकैलागि अमूल्य सम्पदा हो । यथार्थमा यो क्षेत्र हाम्रो ग्रहको अनन्य ढुकढुकी हो — यस्तो ठाउँ जसबाट हामीले आफ्नो यस जीवन्त विश्वको स्वास्थ्य अवस्था अनुमान गर्न सक्छौँ ।

हाम्रो ग्रहको जिउँदो ढुकढुकी यस हिन्दुकुश हिमालय क्षेत्र अहिले निर्बल भएको छ । हिन्दुकुश हिमालय क्षेत्र अहिले वातावरण क्षय, पर्यावरणले झेल्न नसक्ने गतिमा भैरहेको विकास कार्य, जलवायु परिवर्तनका जटिल असरहरू तथा आर्थिक र सामाजिक अन्यौल आदि विभिन्न कारणबाट खतरामा छ । अध्ययन अनुसन्धानमा एक कदम तथा विकास कार्यमा अर्को कदम राखेर काम गर्दै हामी नीतिनिर्माणमा प्रभाव पार्दै विश्वको सबैभन्दा जटिल क्षेत्रमध्ये एकमा दिगो विकासलाई प्रवर्धन गर्न प्रयत्नरत रहन्छौँ ।

हाम्रो ज्ञान त्यस्तो सम्पदा हो जसलाई सबैबीच बाँड्ने हाम्रो दृढ निश्चय छ । हामी ज्ञान सिर्जना गर्छौँ, समस्याहरूलाई बुझ्ने प्रयत्न गर्छौँ र अध्ययनकार्य सहजीकरण, तथ्यांक उत्पादन तथा उत्तम अभ्यास आदानप्रदान मार्फत सम्भावित समाधान प्रस्तुत गर्दछौँ । हामी सूचना आदानप्रदान गर्छौँ र हिन्दुकुश हिमालय क्षेत्रबारे आफ्नो डाटालाई विश्वव्यापी अध्ययनहरूमा सामेल गर्दै क्षेत्रीय तथा विश्वव्यापी आदानप्रदानकालागि स्थान सिर्जना गर्छौँ ।

हामी जलवायु परिवर्तन तथा वैश्वीकरणजस्ता शक्तिले स्रोतसाधन तथा समुदायहरूलाई जोखिमतर्फ धकेलिरहेका देश तथा संस्कृतिमाझ काम गर्दछौँ । हामी पर्वतीय विषयबारे चेतना अभिवृद्धि गर्छौँ तथा पर्वतका स्वरलाई विश्वव्यापी मञ्चमा बुलन्द गर्छौँ । हामी विभिन्न श्रेणी, संस्था तथा विधामाझ काम गर्दै यस क्षेत्रका राष्ट्रहरूलाई विज्ञान तथा ज्ञानको सेरोफेरोसँग गाँस्दछौँ ।